Thús
Wat aardich datsto efkes op ús ynternetside sjochst. Fan herte wolkom!
Tûzen Triennen yn it koart
Al sûnt 1997 witte wy mei ús frouljuskoar it publyk te boeien en te reitsjen! Dat sit ‘m net allinnich yn de muzikaliteit fan ús optredens, mar seker ek yn ús entûsjasme, ferrassende akts op en foar it poadium en it praatsje tusken de ferskes troch. Op bekende melodyen skriuwe wy sels ús teksten, altyd yn it frysk. Dy teksten kinne hiel gefoelich wêze of krekt trochspekt fan in soad humor en selsspot, mar altyd geane se oer saken wêr’t wy froulju yn it libben mei te krijen ha. En dat is in lange list!
Refurbished
Yn 2023 hawwe wy in nij programma gearstald: Refurbished. By dit Ingelske wurd kinst tinke oan: opnij brûke, opkallefaterje, sirkulair en opleuke. Wy brûke foar dit programma dan ek wat âlde ferskes, mar dan krekt efkes oars as earst, en wy ha tal fan nije ferskes skreaun oer dit tema.
Al ferskate kearen hawwe wy mei ‘Refurbished’ in spetterjend optreden jûn. Yn sealen en in tsjerkje, mar ek bûtendoar op de muzykdei yn Akkrum. Meastal yn Fryslân, mar ek in kear bûten ús provinsjegrinzen, by de Fryske Krite fan Apeldoarn. Mar, wêr’t wy tegearre mei ús muzykmannen ek optrede, we meitjse der altyd in feestje fan!
Us folgjend optreden wurdt grif ek hiel feestlik! Bestel kaarten fia QR koade of e-mail, beide steane op de poster.
Us boeke of earst noch wat mear witte?
De kommende tiid sille wy faker mei ‘Refurbished’ de boer op. Jim kinne ús dus boeke foar jim dielnimmers, meiwurkers, besikers of frijwillichers! Nim dêrfoar kontakt op mei Dieneke, fia de knop Kontakt. Sy sil jim graach ynformearje oer ús mooglikheden en kosten en mei jim in optreden ‘op maat’ regelje, op in middei of jûn.
It hjoeddeistige bestjoer
- Wikje de Vries – foarsitter
- Wietske Sinnema – skriuwer en kontaktpersoan muzyk- en meneuvelkommisje
- Marian Drewes – ponghâlder
- Dieneke Hamstra – kontaktpersoan optredens
- Fetsje van der Werff – kontaktpersoan PR kommisje